Os estereotipos sociais e as percepcións sobre a capacidade ou a realidade do mercado laboral manteñen a brecha de xénero nas carreiras tecnolóxicas. A infrarrepresentación das mulleres nestes estudos supón un reto para todas as universidades españolas e europeas, e constitúe unha grave ameaza para a igualdade, dado que están relacionados coas profesións máis demandadas actualmente e nos próximos anos, e que ademais contan cos salarios máis elevados.
A UVigo non se libra desta brecha de xénero. Nas carreiras tecnolóxicas da UVigo as 1.031 estudantes rexistradas nos tres campus durante o período 2021/22 supoñen só o 23,5% da matrícula total neste ámbito.
Os datos evidencian o difícil que é paliar a brecha de xénero nas carreiras tecnolóxicas. A pesar de que na UVigo a matrícula de mulleres en todos os graos impartidos é lixeiramente superior á dos homes, a presenza destes só é superior nas enxeñerías, onde só son mulleres dúas de cada dez estudantes.
Só tres carreiras tecnolóxicas contan con maioría de estudantes femininas e curiosamente dúas delas son dobres graos estreados o curso pasado, que teñen unha maior duración e esixen máis esforzo, o que indica que o esforzo ou a dificultade non é o principal problema. Entre os graos tecnolóxicos con menos alumnas atópanse o de Enxeñería Informática e o de Enxeñería Mecánica, cun 13,8% e 13,04% de mulleres matriculadas, respectivamente. Os números tampouco son bos en Enxeñería Electrónica Industrial e Automática e en Enxeñería Eléctrica (15,4% e 16,2%, respectivamente). No grao en Enxeñería de Tecnoloxías de Telecomunicación, a representación de alumnas matriculadas tamén é baixo, un 18,6% (un total de 114 alumnas fronte aos 498 alumnos matriculados). Con todo, se se toman os datos dos másteres cabe destacar que en moitas ocasións aumenta a presenza de mulleres. Por exemplo, no Máster en Enxeñería de Telecomunicación no curso 2020/21 había 44 homes e 20 mulleres, é dicir a taxa de mulleres nesta titulación foi do 31,25%.
E ao igual que no resto de universidades españolas, os nesgos de xénero non só afectan as carreiras tecnolóxicas. Estes tamén se producen nas carreiras relacionadas coa saúde e a educación, elixidas maioritariamente por mulleres.